بدي احكي قصة يا اخوان ... الله واحد مالو ثان
القصة قصة انسانة ... عاشت في قديم الزمان
اولها كان يا مكان ... كان إلها اربع شبان
محمد واحمد وغسان .. وأصغرهم اسمو عدنان
لما كبروا هالصبيان ... شاهدوا غدر اللئام
سألو امهم يا يما ... ليش ما النا بستان
وينو ابونا يا يما ... قلتيلنا انو رجعان
وليش منسكن بالخيمة ... من دون كل الجيران
قالت امهم يا ولادي ... كان النا اجمل بستان
حرثوا ابوكم بذراعو ... زرع العنب والرمان
وكلو في وكلو مي ... كلو خضرة واطمئنان
وبجنبه إلنا بياره ... فيها الحامض والحليان
وفي البيارة بير كبير ... حفره أبوكم للعطشان
وقباله شارع طويل ... بينزل دغري على بيسان
على طرفه كله أزهار ... ورد وفل وقحوان
وبغربه كان إلنا بيت .. وقباله ساحة وميدان
وفي الساحة مربط للخيل ... لأبوكم شيخ الفرسان
فيه القهوة وفيه الهيل ... فيه حدث ويامكان
كنا نقضي فيه الليل ... والقمر فوقنا سهران
نتسامر ونقول يا ليل ... والدنيا كلها امان
كنتو انت ولاد صغار ... تنزلو على البستان
تقطعوا من الاثمار ... تلعبو مع الاصغان
مر الزمن يا أحبابي ... كبر العنب والرمان
لكن الظالم يا أولادي ... غادر ما الو امان
هجموا علينا الاعادي ... والطفل قبل النسوان
سقط أبوكم يا أولادي ... وهو يدافع عن البستان
واللي استشهد استشهد ... وتصاوبوا كل السكان
-------------------------------------------
اليوم كبرتو يا ولادي ... صرتو من الرجال الشجعان
فلسطين بتستنى ... بتستنى كل الفرسان
فلسطين بتستنى ... بتستنى كل الفرسان
وتنادي هي يا أولادي ... حرروني من العدوان
-------------------------------------------
اتطوع احمد وغسان ... لحقوا محمد وعدنان
اتطوع احمد وغسان ... لحقوا محمد وعدنان
نزلوا على فلسطبن ... حملوا المدفع والقران
عند حدود البيارة ... والقمر يرسل لمعان
عند حدود البيارة ... والقمر يرسل لمعان
وأستشهدوا بالغارة ... قبل ما يشوفوا البستان
واستشهدوا بالغارة ... ما قدروا يشوفوا البستان
على باب الخيمة وقفت ... ام احمد ام الشجعان
قالت يا ربي حمدك ... ما غيرك اني حمدان
رايح ابكي ورايح انوح ... لكن يا ربي فرحان
رايح ابكي ورايح انوح ... لكن يا ربي فرحان
مما راق لي
لا اله الا أنت سبحانك أني كنت من الظالمين 
